O sector TIC en Galicia pertence a ese grupo de industrias cun gran potencial de desenvolvemento na nosa comunidade debido ao gran incremento de mercado que vai producirse nos vindeiros anos. Actualmente o volume de negocio deste sector en Galicia ocupa o 5º lugar por orde de importancia a nivel nacional.

En Galicia, coa excepción das operadoras de telecomunicacións, o tecido empresarial que atende este mercado está composto fundamentalmente por micro-empresas e pequenas empresas (87%), a maior parte adicados aos servizos e distribución informáticos. É un sector novo no que case un 60% das empresas teñen menos de 10 anos.

As empresas de maior tamaño están centradas nas actividades de fabricación tanto eléctrica como electrónica. Hoxe a tecnoloxía galega é plenamente exportable posto que xa se utilizan noutros países sistemas e patentes de empresas electrónicas galegas, como poden ser sistemas de cableados para a automoción ou sistemas dixitais avanzados.

No ámbito da electrónica de consumo hai unha marca galega que encabeza as vendas en España en varios tipos de produtos. Polo que se refire ao segmento manufactureiro da industria de comunicación, Galicia conta co grupo líder deste sector en España.